Համառոտ բովանդակությունը

Սա երիտասարդ զույգի դրամատիկ սիրո պատմություն է:
Տղան բանակում ծառայության ժամանակ հեռախոսով իմանալով, որ իր սիրած աղջիկը հղի է՝ ինքնակամ լքում է զորամասն ու գնացքով ճանապարհվում նրա մոտ՝ միասին որոշում կայացնելու՝ հղիության ընդհատման վերաբերյալ: Ճանապարհին՝ գնացքի մեջ տեղի ունեցած անհեթեթ սպանությունը, որն իր կարծիքով իր պատճառով է տեղի ունեցել, նրան ստիպում է փոխել որոշումը, քանի որ մեղքի զգացումը նրան հանգիստ չի տալիս:

Ռեժիսորական նոթեր

Մենք սիրում ենք կյանքը։ Սիրում ենք, ինչպիսին էլ այն լինի, սիրում ենք ամեն վայրկյանն ու ամեն օրը, գույնը, քամին, ձայնը, որքան էլ որ այն տարօինակ է ու դաժան, որքան էլ որ այն փխրուն է, ինչպես «ապակե կախազարդը»։
Գաղափարն անշրջելիությունն է։ Երբ անկարող ես փոխել կատարվածը։
Ցավոք միշտ չէ, որ մենք դառնում ենք իրավիճակի տերը եւ միշտ չէ,որ կարող ենք ճիշտ որոշում կայացնել, բայց համարյա միշտ պատասխան ենք տալիս մեր կատարած յուրաքանչյուր քայլի համար։
Ֆիլմում որոշ դաժան տեսարաններ, դառնալով հակակշիռ, դարձի են բերում ֆիլմի հերոսներին, բացում նրանց աչքերը, որի շնորհիվ փոխվում է նրանց վարքագիծը։
«Ապակե կախազարդը» դա այն փխրուն խորհրդանիշն է, որի մասին պատմվում է այս ֆիլմում։ Դա այն փխրուն հարաբերությունն է, որ ունենում ենք մենք սիրահարված ժամանակ, դա այն փխրուն զգացումն է, երբ աղջիկը հղիանում է, դա այն է, երբ ամեն վայրկյանը վտանգի մեջ է, միեւնույն ժամանակ՝ թանկագին։