Համառոտ նկարագրություն

Մտահաղացումը՝ մեր դժնդակ օրերի վերլուծությունն է, 2020թ. ադրբեջանա-թուրքական դավադիր պատերազմից հետո, երբ հազարավոր զոհերի, անհետ կորածների ու գերիների, բռնի տեղահանվածների, հուսալքված հասարակության ու մոլորության մեջ հայտնված իշխանությունների ֆոնին՝ պահանջ է առաջանում ներկայացնել լուսավոր գաղափարներ, որոնք կարող են փարոսի դեր ստանձնել եւ ուղենիշ դառնալ համախմբման ու գոյատեւման համար։

Մեր հերոսներն իրական մարդիկ են, որոնք մի դեպքում իրենց կամքից անկախ (պատերազմի արդյունքում) դարձել են բռնի տեղահանված, ունեզրկված, հայտնվել ընչաքաղքության մեջ, մյուս դեպքում՝ իրենց տունն ու տեղը, այգիները, դաշտավայրերը, արոտավայրերը պարտադրված թողել են թշնամուն ու անզեն ապրում են սահմանագծին՝ թշնամու զինվորի նշանառության տակ՝ կենդանի թիրախ դարձած… Այս մարդիկ զրկվել են մարդու հիմնարար իրավունքներից՝ ապրելու, աշխատելու, արարելու հնարավորությունից… ի վերջո՝ ազատության։

Այս մարդիկ «փրկչի» են սպասում, որքան էլ որ այն երեւակայական լինի, քանզի սարսափում են իրենց վերապրած իրականությունից։ Եվ այս իրավիճակում ֆիլմում հայտնված Դոն Կիխոտի կերպարի գեղարվեստական մարմնացումը, որը կարմիր գծով անցնում է ողջ պատմության ընթացքում, փաստում է, որ իրականության եւ երեւակայության սահմանը շատ մոտ է, պարզապես դրան հավատալ է պետք։

Ֆիլմում օգտագործվում են լրատվական տեղեկություններ, արխիվային տեսանյութեր պատերազմական գործողություններից։

Նկարահանումներն իրականացվել են Հայաստանի տարբեր մարզերում՝ ուր տեղակայվել են այդ մարդիկ, ինչպես նաեւ սահմանամերձ թեժ գոտիներում՝ Շուռնուխում, Սոթքում։

ԳՈՐԾԸՆԿԵՐՆԵՐ

ԸՆԿԵՐՈՒԹՅՈՒՆԸ

«ԱՅՍՕՐ-ՊԼՅՈՒՍ» ՖԻԼՄԱՐՏԱԴՐՈՒԹՅՈՒՆԸ Հայաստանի առաջին անկախ կինոընկերությունն է, որն ստեղծվել է 1990 թվականին ԽՍՀՄ փլուզումից հետո: Մենք անկախ կինոնարտադրության ռահվիրաներն ենք, ովքեր միջազգային լսարանին ներկայացրել են հայկական անկախ կինոն: Մեր ֆիլմերն ու նախագծերը ընտրվել եւ ներկայացվել են գրեթե բոլոր խոշոր կինոփառատոներում եւ շուկաներում, ներառյալ Կաննի, Բեռլինի, Ռոտերդամի, Լոկառնոյի, Բուսանի եւ այլն:

ՀԻՄՆԱԴԻՐՆԵՐ